Nettur laugardagsbíltúr

Systkinin

Originally uploaded by bjogginn

Byrjuðum daginn á því að keyra vestur í Grundarfjörð, fengum okkur að borða þar á Kaffi 59. Fínar pizzur sem runnu ágætlega niður með gosdrykkjum. Þaðan lá leiðin í vesturátt, ókum síðan yfir Fróðárheiðina og stoppuðum aðeins á Búðum, lékum okkur aðeins í fjörunni þar. Þaðan lá leiðin að Arnarstapa og þar tók það sama við, göngutúr og leikur. Fórum svo að Hellnum, krakkarnir léku sér aðeins í fjörugrjótinu þar og rennblotnuðu náttúrulega, fengum okkur síðan kaffi og meððí í litla kaffihúsinu á Hellnum. Þegar allir voru mettir var ákveðið að halda áfram og fórum við niður á Djúpalónssand og þaðan gengum við gegnum hraunið út í Dritvík, komum við í völundarhúsinu við Dritvík og fórum svo niður í víkina og þar tók ég þessa mynd af börnunum. Gengum síðan til baka og niður í fjöruna á Djúpalónssandi, þar var nokkuð mikið brim og krakkarnir fóru í kapp við öldurnar, þ.e. að passa sig á að þær náðu þeim ekki og gekk það bara nokkuð vel. Keyrðum síðan sem leið lá út á Öndverðarnes og Svörtuloft, skoðuðum aðeins vitana þar og húsarústir á Öndverðarnesi sem og niðurgrafna brunninn Fálka. Ókum svo gegnum Hellissand og Rif, sýndi þeim bryggjuna sem ég sigldi frá sumarið '95 þegar ég var á trillu þar. Ókum svo inn í Ólafsvík, fengum okkur pizzur á Hobbitanum (gamli grillskálinn) og enduðum svo á að keyra í Borgarnesið. Vorum komin þangað rúmum 12 tímum eftir brottför þaðan í morgun.
Þetta er semsagt búinn að vera frábær dagur og ég var ánægður að sjá hvað krakkarnir skemmtu sér við þetta.

Fleiri myndir á http://www.flickr.com/photos/bjogginn

Athugasemdir

[Óskar Þorkelsson, 10.8.2008 kl. 12:22]

Þetta hefur verið flott ferð hjá þér, það eru fáir staðir sem eru magnaðari en Snæfelssnesið í góðu veðri.

[Björgvin S. Ármannsson, 10.8.2008 kl. 23:07]

Ó já þetta var frábær ferð. Hingað til hef ég bara keyrt þarna en núna varð breyting á því.

[Íris (IP-tala skráð) 12.8.2008 kl. 00:01]

Þú ert ekkert smá duglegur að fara með krakkana eitthvert... Þarf að taka þig til fyrirmyndar og fara með skæruliðana mína eitthvað meira það sem eftir er af þessu sumri og næsta sumar hehe .....